អំពីស្ត្រីជាភរិយា
អំពីផលកម្មស្រ្តី ៤ ពួក
នាងមល្លិកា ជាអគ្គមហេសីព្រះបាទបសេនទិកោសល នាងទូលសួរអំពីស្ត្រី ៤ ពួកថាៈ
ទី១‑ស្រ្តនោះអាក្រក់ក្រៃលែងអាក្រក់ ប៉ុន្តែមានភោគសម្បត្តិច្រើន គ្មានខ្វះអ្វីសោះ។
ទី២‑ស្រ្តីនោះភោគសម្បត្តិគ្មានទេជាទីទាល់ក្រ ប៉ុន្តែមានរូបសម្បត្តិអស្ចារ្យគួរជាទីទស្សនា។
ទី៣‑ស្ត្រីនោះកើតមកក្នុងលោកនេះភោគសម្បត្តិក៏គ្មាន ជាស្រ្តីទីទ័លក្រ ថែមទាំងរូបសម្បត្តិក៏អាក្រក់ដែរ។
ទី៤‑ស្រ្តីកើតមកក្នុងលោកនេះ ភោគសម្បត្តិក៏មាន រូបសម្បត្តិក៏មាន តើស្រ្តីនោះ ធ្វើបុណ្យបាបដូចម្តេចខ្លះ ព្រះអង្គ? ។
ព្រះពុទ្ធជាម្ចាស់ទ្រង់ឆ្លើយតបថាៈ
ស្រ្តីទី១ ‑ តែងតែធ្វើទាន ជាស្ត្រីមិនរក្សាសីល
ស្ត្រីទី២ ‑ ធ្វើសីល គឺរក្សាសីលដ៏ម៉ត់ចត់ ទាននាងមិនធ្វើ
ស្ត្រីទី៣ ‑ ទានក៏មិនឲ្យ សីលក៏មិនរក្សា
ស្ត្រីទី៤ ‑ ទាន់ក៏បានឲ្យ សីលក៏បានរក្សា។
ស្រ្តីប្រកបដោយកល្យាណធម៌ ៥ យ៉ាង
១‑បុព្វដ្ឋា យិនី ជាស្រ្តីក្រោកឡើងមុនប្តី
២‑បច្ឆានិ បាតិនី ជាស្រ្តីបរិភោគ នឹងផ្ទុំក្រោយប្តី
៣‑និវាសង្កបតិសេវនី ជាស្រ្តីរួមសំវាសជាមួយនឹងប្តី ឥតមានគំនិតអាក្រក់។
៤‑បិយវាទី ជាស្រ្តីមានសវនីយ៍ពិរោះគួរឲ្យព្រះរាជា ផ្ទៀងព្រះកាណ៍ចាំស្តាប់
៥‑មនាបចារិនី គឺជាស្ត្រីចេះផ្គាប់ផ្គុនប្តីមិនឲ្យឆ្គងចិត្តសោះ។ កល្យាណធម៌នេះគឺភរិយាត្រូវគោរពប្តីដើម្បីនៅជាសុខ។
រឿងនេះ កាលព្រះអង្គគង់នៅជាតិយាវ័នឧគ្គហមេណ្ឌក ទូលសួរ។ សុត្តន្តបិដកអង្គត្តរនិកាយ។
ស្រ្តីនឹងក្បត់ចិត្តប្តីដោយហេតុ ៩ យ៉ាង
១‑អារាមគនសីលា ឧស្សាហ៍ដើរទៅលេងសួនច្បា
២‑ឧយ្យានគមសីលា ឧស្សាហ៍ដើរទៅលេងឧទ្យាន
៣‑នទីតិត្ថគមនសីលា ឧស្សាហ៍ដើរទៅលេងកំពង់ទឹក
៤‑ញាតិកុលគមនសីលោ ឧស្សាហ៍ដើរទៅកាន់ត្រកូលញាតិ
៥‑បរកុលគមនសីលា ឧស្សាហ៍ដើរទៅលេងត្រកូលអ្នកដទៃ
៦‑អាភារណាយគមនសីលា ឧស្សាហ៍ទៅរកគ្រឿងតែងខ្លួន
៧‑មជ្ជបាយិទី ចូលចិត្តផឹកទឹកស្រវឹង
៨‑ភិត្តិច្ឆិទ្ទេសុ ឳលោកនី ចូលចិត្តសំឡឹងមើលតាមចន្លោះជញ្ជាំង នឹងតាមបង្អួច
៩‑គាមទ្វារេ ឋិតសីលា ឧស្សាហ៍ទៅឈរលេងក្បែរទ្វារភូមិស្រុក។
ស្ត្រីមើលងាយប្តីដោយហេតុ ៨ យ៉ាង
១‑ទលិទ្ទតា ព្រោះប្តីជាមនុស្សកំសត់ទុគ៌ត
២‑អាតុរតា ព្រោះប្តីជាមនុស្សមានជំងឺជានិច្ច
៣‑ជិណ្ណកតា ព្រោះប្តីជាមនុស្សចាស់គ្រាំគ្រា
៤‑សុរាសោណ្ឌតា ព្រោះប្តីជាមនុស្សផឹកសុរា
៥‑មន្ទតា ព្រោះប្តីជាមនុស្សល្ងង់ខ្លៅ
៦‑បមត្តតា ព្រោះប្តីជាមនុស្សធ្វេសប្រហែស
៧‑សព្វកិច្ចេសុ អវត្តនិកតា ព្រោះប្តីមិនប្រព្រឹត្តធ្វើកិច្ចការទាំងពួង
៨‑សព្វធនមនុប្បាទនា ព្រោះប្តីស្វែងរកទ្រព្យមិនបាន។
ភរិយា ៧ ពួកគឺៈ
១‑អយ្យាភរិយា ភរិយាវាតអំណាចសង្កត់សង្កិនលើប្តី ដូចជាម្ចាស់
២‑វចកា ភរិយា ភរិយាបៀតបៀន ធ្វើទុក្ខប្តី ដូចជាអ្នកសំលាប់
៣‑ចោរី ភរិយា ភរិយា ដូចជាចោរលួចទ្រព្យរបស់ស្វាមី
៤‑មាតា ភរិយា ភរិយា ដែលផ្គត់ផ្គង់ប្តីដូចមាតា
៥‑ភគិនិ ភរិយា ភរិយា ដែលចេះទំនុកបំរុងប្តី និងចិត្តពិតត្រង់ស្មោះសចំពោះប្តីដូចជាប្អូនស្រី
៦‑ទាសី ភរិយា ភរិយា ដែលគោរពប្រតិបត្តិប្តីដូចជាទាសី
៧‑សខី ភរិយា ភរិយា ដែលប្រតិបត្តិកោតខ្លាចចិត្តស្វាមី ស្មោះត្រង់មិនវៀចវេរដូចជាមិត្តសំឡាញ។
ភរិយាត្រូវប្រតិបត្តិប្តីដោយស្ថាន ៥ យ៉ាង
១‑សុសំវិហិតកម្មន្តោ ចាត់ចែងការងារដោយផ្ចិតផ្ចង់
២‑សុសង្គហិតបវិជនា សង្គ្រោះដល់ញាតិរបស់ស្វាមី នឹងញាតិរបស់ខ្លួនដោយស្មោះស្មើ
៣‑សម្ភតញ្ចអនុរក្ខតិ ចេះថែទាំទុកដាក់ទ្រព្យសម្បត្តិ ដែលស្វាមីរកបានមកហើយ
៤‑អនតិ ចារិនី មិនប្រព្រឹត្តកន្លងចិត្តប្តី
៥‑ទក្ខា ច ហោតិ អនលសោ សព្វកិច្ចេសុ ឆ្លាតប្រសប់ព្រមទាំងមិនខ្ជិលច្រអូសក្នុងកិច្ចការគ្រប់យ៉ាង។
មាតាចង់បានបុត្រដោយហេតុ ៥ យ៉ាង
១‑ភតោ មានោ ភវិស្សតិ បុត្រដែលយើងចិញ្ចឹមហើយ នឹងចិញ្ចឹមយើងវិញ
២‑កិច្ចំ វា នោ ករិស្សតិ បុត្រនឹងជួយកិច្ចការយើង
៣‑កុលវំសោ ចិរំ ថស្សាតិ វង្សត្រកូលនឹងស្ថិតនៅយូរ
៤‑អថ វា បន បេតានំ កាលកតានំ ទក្ខិណំ អនុប្ប ទស្សតិ មួយទៀតបុត្រនឹងឧទ្ទិសទក្ខិណាទានឲ្យដល់យើង ដែលធ្វើមរណកាលទៅកាន់បរលោក
៥‑ទាយជ្ជំ បដិបជ្ជតិ បុត្រប្រតិបត្តិទទួលយកមត៌ក។ អង្គត្តរ ‑ បញ្ចក ‑ ភាគ ៤៤ ទំព័រ ៨៥។
No comments:
Post a Comment